புதிய வீடு

மாலை உலாசென்று சென்று
நான் கண்டுபிடித்தது அந்தத் திறந்தவெளி
எனது புதிய வீட்டை நிர்மாணிக்க சிறந்த ஓர் இடம்
ஆர்வமுடன்
என் உடம்பெங்கும் சுற்றித் தழுவித்
தீண்டிற்று திறந்தவெளியின் சர்ப்பக்காற்று

விழி சொருகி என்னுள்
தூரத்தில் தென்பட்டது
ஒரு மலையும் அதன் இடுப்பிலிருக்கும் காடும்.
“ம்மா...!“ என்று எழுந்த கன்றின் குரலாய்
பெருக்கெடுத்ததொரு நேசம் சாட்சியாக
அம்மலையில் ஒரு குகையிருப்பதை உணர்ந்தேன்,
அக்குகையில் நெடுங்காலமாய் நான் வாழ்ந்துவருவதாகவும்.

லாரி லாரியாய்க் கற்கள் வந்திறங்கின என்முன்
எங்கிருந்து? எங்கிருந்து?
அதோ அந்த மலையிலிருந்து என்றார்கள்