இறுதி விண்ணப்பம்

அந்தக் காலங்களில்
குட்டி எஜமானர்களை விளித்த
ஏழைப் பண்ணையாட்களின் அந்தக் குரல்களில்
நானும் என் குரல் ஒலிக்கக் கேட்டேன்

அய்யா... அய்யா.. என்று
நெஞ்சுருக ஒலித்த அந்தக் குரல்!
பாசமோ
காணக் கிடைக்காத நேசமோ
தெய்வ தரிசன உருக்கமோ அல்ல

அது ஓர் இறைஞ்சல்

தன் மதிப்பின்மையும்
உழைப்பின் பாரமுமாய்த்
திக்கற்றுத் தோற்றுப்போன பலியாள்
தானே அறியாது
இறுதியாய் வைத்த விண்ணப்பம்