பாரம்

ஒவ்வொருவராய்க் கழன்று சென்றுவிடத்
தனித்து நின்ற அவன் தலையில்
பாரம் முழுதும் அழுத்துகின்ற வேதனை

கழன்று சென்றோர் ஒவ்வொருவருமே
பாரம் மேல் பாரமாக
வேதனை மேல் வேதனை

ஏகமாய் நின்றதொரு பிரக்ஞை

இலைகள் பாரமெனவும்
இனி தளிர்த்தலும் பாரமெனவும்
எல்லா இலைகளையும் உதிர்த்து நின்ற மரம் கண்டது:
வானமே இலைகளாகிவிட்ட பெரும்பாரம்,
முள்கிரீட மேற்று நிற்கும் பெருந்துக்கம்,
ஏகமாய் நின்றதொரு பிரக்ஞை,
இன்மையில் பூத்த ஒரு குழந்தையின் சிரிப்பில்
இல்லாமற் போகும் மாயம்