விண்ணும் நதியுமாய்...

விண்ணும் நதியுமாய் விரிந்து கசிந்த
நிலக் காட்சி அகண்டமோ,
முழங்கால் அணைந்து சிரிக்கும் நீரில்
எருமை குளிப்பாட்டிக் கொண்டிருந்த
மூதாட்டியைப்
பாவாடை சட்டையணிந்த
சிறுமியாய்க் காட்டிற்று?
பிரக்ஞையில்லா மனிதர்களையும்
தேன் பாகில் திளைக்கும்
சிற்றெறும்புகளாய்க் காட்டிற்று?

மேக வெளியிடையே
கைவிடப்பட்ட நிலவோ,
போரிலும் பேராசையிலுமாய் உழலும் உலகை
இருள் நடுவே துயின்றுகொண்டிருக்கும்
குறைப் பிறவியாய்க் காட்டிற்று?