பறவைகள் அதிராத மெல்லடிகள்

பறவைகள் அதிராத மெல்லடிகள் முயன்று
தேற்றிக் கொண்டிருந்தான்,
வெடிச் சத்தம் கேட்டுச்
சிதறித் துடிக்கும் பறவைகளாய்த்
திணறும் சொற்களை.

துயரோடு துயராகி உகுத்த
கண்ணீரும் கடப்பாறையும் கொண்டு
ஓசையின்றி
உடைத்துக் கொண்டிருந்தான்,
அவிந்து கெட்டித்த அதிர்ச்சிகளின்
மவுனப் பெருந் துயர்ச் சுவர்களை.

இடிந்து சரிந்த சுவர்களுக்கப்பால்
ஒளிரும்
நித்ய உதயக் காதற் கதிரவனை
வெற்றுக் கனவும் அபூர்வமுமாக
விட்டு விடுவதோ நியதி?