நீர்க் குடம்

ஆசையோடு புகுந்து
நிரம்பிய குடத்தைத்
தன் ஆழத்துள் வைத்துக்கொள்ள
ஆர்வமாய் இழுக்கும்
குளத்தை
எதிர்த்துத்
தூக்கிக்கொண்டன வளைக்கரங்கள்
அலம்பித் திமிறித்
துள்ளிக் குதித்து விழுந்த நீரை
பாராட்டி அணைத்துக் கொண்டே
அலைமோதி அரற்றிற்று குளம்
குடத்து நீரும் அவள் இடுப்பில்
விக்கி விக்கி
அழுதுகொண்டே போயிற்று எனினும்
சமாதானிக்கவே
சமன் நிலையே நோக்கிச் சென்றனர்
குளமும், அவள் இடுப்புக்
குடமும்