பிக்னிக்

நெருப்பு மூட்ட முடியாமல்
கிழித்த தீக்குச்சிகளையெல்லாம்
காற்று அணைக்கும்

”காப்பாற்ற வெளியிலே நான்
தீ மூட்டிச் சமைப்பதெப்போ?”

சருகுகளையெல்லாம் கூட்டுங்கள்
செத்த
சுள்ளிகளையெல்லாம் அடுக்குங்கள்
இவைகொண்டே
காப்பொன்று ஆகாதா?
ஆ
வட்டமாய் நெருங்கிச்
சூழ்ந்து கொள்ளுங்கள் நண்பர்களே!
”கொளுத்துகிறேன் இத் தீக்குச்சியும்
புஸுக்கென்று போய்விட்டால்?”

அன்று;
தீ பற்றிக் கொள்ள
குதூகலம் கொப்பளித்துப் பொங்கி
ஆரவாரம் உயர்ந்து தொட்ட
அங்கேதான்
கைமறந்த தீப்பெட்டி தான்
’ப்ஹார்” என ஜ்வலித்து
நெருப்புக்குள் நெருப்பாயிற்று