விஷம்

பாற்குடத்தில்
விழுந்துவிட்டது
விஷம்
வேர் பிடித்துப் பரவுமுன்
அள்ளி எடுத்துவிட
தவிக்கும் கைகள்
எல்லாமே விஷ அழுக்குக் கைகளானால்?

ஆ
தீண்டிவிட்டது சர்ப்பம்
புண்ணில்லாத வாய்கொண்டு
கடித்துத் துப்பு உடனே
ஏனெனில்
குடலுடம்பு ஒரு புண்

காலங்காலமாய்
நான் விசுவாசத்தோடு
தொழுது வந்த தெய்வம்
ஒரு விஷ சர்ப்பம்
(பின்னால்தான் இது தெரிந்தது)
ஒரு நாள் என்னைக் கொன்று
இட்டுச் சென்றது ஓர் அமுதவெளிக்கு
இன்று அமுதவெளி முன்
ஒரு விஷ சர்ப்பம் நான்
பாற்குடத்தில் விழுந்துவிட்ட
துளி விஷம்

தெய்வத்தைக் கொன்று
பட்டத்தை அபகரித்துச் சூடிக்கொள்
இல்லையேல்
தெய்வம் உன்னைக் கொல்லவிடு
ஆள்பவன் ஒருவனுக்கே இது இடம்