என்னை எடுத்துக்கொண்ட இவள்

விடாய்த்துப்
பிளந்த வாயுடன்
குழாயடியில்
குடம்
பதறிப் பதறி
ஏந்திக் குடிக்கும்

தாகந் தீர்ந்த பின்னும்
விடாது பொழிந்து
வழியும் ஜலத்தில்
தேக மெல்லாம் சிலிர்த்துத்
திணறத் திணறச்
சுகிக்கத் தொடங்கும்
பிறகு

உள்ளும் புறமுமாய்
பெருகிவிடும் வெள்ளத்தில்
அமிழ்ந்து
கைவல்யமாயிருக்கும்
அப்போது

ஒரே குறுக்கீடாயிருக்கும் ’நானு’ம்
கரைந்துகொண்டிருக்கும்
கடைசியாய்

ஒன்றேயான வெள்ளத்தில் கலந்து
மறைந்து போயிருக்கும்
ஆனால் இவளோ

நான் சுகிக்கத் தொடங்கியதுதான் தாமதம்
தூக்கிக்கொண்டு போய்விட்டாளே
வாக்குறுதிகள் அளித்தபடி