துளசிப் புதர் நடுவே

அனைத்து இயல்களும் கூடிய ஒரு கணிதச் செயல்பாடோ
ஏதோ ஓர் உக்கிரம் கண்விழித்து
சகலத்தையும் உலுக்கி வேறோர் ஒழுங்கில் அடுக்கிவிட்டு
மீண்டும் விழிமூடிக் கொண்ட சாகசமோ

துளசிப் புதர் நடுவே வெகுகாலம் தேம்பியபடி
சிக்கிக் கிடந்த ஒரு தென்னோலைக் கீற்று
எதிர்பாரா வேளை ஒன்றில் பாம்பாய் நெளிந்து
மீண்டும் ஓலையானது?

உண்மைதான். நேற்றிருந்த தோட்டமல்ல
இன்று காணும் இத்தோட்டம்